CCCIII.

1403, Juni 16. Schloss Frankenstein.

Notariatsprotokoll über Zeugenaussagen betreffs eines streitigen Hühnerzinses in Pilz.

In nomine domini amen. Sub anno nativitatis eiusdem millesimo quadringentesimo tertio, indictione undecima, die sexta decima mensis Junii, hora vesperorum vel quasi, in magna stuba castri Frankenstein, pontificatus sanctissimi in Christo patris ac domini, domini nostri, domini Bonifacii divina providentia pape noni anno quarto decimo, in mei notarii publicii subscripti testiumque infrascriptorum ad hoc vocatorum specialiter et rogatorum presentia rustici subscripti personaliter constituti pro parte Zacharie, Conradi, Ulrici aliorumque fratrum ipsorum dictorum Streyd de Gerundigiswalt Wrat. diocesis; contra et adversus venerabilem et religiosum virum dominum Johannem, abbatem monasterii de Camencz ordinis Cisterciensis Wrat. diocesis predicte et conventum ibidem producti per famosumque Heinricum de Reybnicz, capitaneum in Franckenstein sub pensa iuramenti more secularium diligenter examinati, non coacti, non conpulsi, nec erronie aut inprovide circumventi, sed mera deliberatione prehabita et ex certa scientia publice rocognoverunt, et expresse Hermannus Piczko de Pilcz, testis primus pro parte, qua supra, productus interrogatus, quid sibi constaret de causa partium predictarum, respondit sibi tantum constare, quod pater ipsius similiter et ipse, ipsis Streyd in Gerundiswalt tres pullos dederunt annuatim et presentaverunt ad triginta vel quadraginta annos citra vel minus; eodem modo dictus Hermannus Michaeli Grawpe vendidit ad dandum ipsis Streyd annuatim similiter tres pullos. Interrogatus, quare et unde illos tres pullos dedissent, respondit, credidisse, se dedisse de quadam particula spectante ad agrum sive bona sua, an de eadem fuit vel non dixit se nescire. Michael Grawpe pro parte, quo supra, productus interrogatus respondit, se emisse bona sua a Hermanno Piczkone predicto tali conditione, ut in solutionem trium pullorum singulis annis ipsis Streyd obligaretur. Quos quidem tres pullos idem Michael dictis Streid tribus annis presentavit. Johannes Hempil testis tertius interrogatus, quid sibi constaret, respondit sibi penitus nichil constare. Paulus Jachim, Nicolaus Spigil, Paulus Ilompke, Mathias Sneyder, Michael Santke, Petrus Schuler scultetus de Pilcz, Thomas de Pylcz, Nicolaus Kausche interrogati, quid ipsis constaret, responderunt, ipsis non plus constare solum quod Priczcones ipsis Streyd tres pullos annuatim dederunt et presentaverunt. Interrogati, unde et quare dati essent, dixerunt se nescire. Nicolaus Oberfürer interrogatus respondit, sibi tantum constare, quod pater Hermanni Piczkonis similiter et Hermannus Piczko ipsis Streid aliquot pullos in numero annuatim dederunt et presentaverunt. Interrogatus, de quo et unde, respondit, se nescire. Mathias de Harthaw interrogatus, quid sibi constaret, respondit, sibi omnino nichil constare facto de presenti. Stanislaus de Harthaw interrogatus respondit sibi nichil penitus constare. Henricus de Banaw et Henricus Polan interrogati responderunt ipsis constare tantum, quod viderunt ipsis Streid ad Gerundigiswalt portare pullos duos vel tres in numero, de quo et unde nesciunt. Nicolaus Lamprecht respondit, sibi tantum fore nutum, quod audivit, quod pulli sunt ipsis Streyd dati annuatim, de quo nescit. Nicolaus Polan dixit, sibi penitus nichil constare de facto. Anshelm de Jonsbach se tantum dixit scire, quod Johannes et Henricus dicti Streyd una vice sibi sic erant lucuti: "Nos habemus etiam censum in Pilcz, quia Hermannus Piczko dat nobis pisces vel pullos annuatim." De quo darentur ipsis, non dixerunt. Mathias Schawchwicz de Henrichiswald interrogatus, quid sibi constaret, respondit sibi tantum constare, vidit enim una vice portare pullos ipsis Streyd de Pilcz ad Gerundigiswald; interrogatus, unde et quare portarent, ipsis illos pullos, responderunt, se dare de pascuis. Rorech interrogatus, quid sibi constaret, respondit, sibi tantum esse notum, quod una dierum cum Johanne Streyd sedit in taberna in Pilcz, veniens Hermannus Piczke honoravit Johannem Streyd cum cerevisia, dicens: "Bibatis mecum, estis enim etiam dominus meus. Nicolaus Reichel fassus est, sibi tantum fore notum", cum erat in servitio dominorum suorum Streyd, vidit Hermannum Piczko dominis suis portare pullos de Pilcz; interrogatus, si sciret, quare et unde portassent pullos, respondit, se nescire. Gobil advocatus monasterii Camencz predicti interrogatus respondii, sibi tantum fore notum, quod ipsis Streyd a Piczkone sunt dati tres pulli annuatim. Romker de Gerundigiswald fatetur, quod vidit ipsis Streyd de Pilcz portare pullos in numeru, quot et de quo nescit. Henricus Menczil interrogatus, quid sibi constaret, respondit, se audivisse, quod quondam novem pulli ipsis Streyd essent dati de Pilcz, an ita sit et de quod nescit. Hensel Vogeler interrogatus, quid sibi constaret, respondit, quod vidit, quod pulli sunt dati ipsis Streyd in numero, quot nescit; interrogatus, unde essent dati, respondit, se audivisse, quod essent dati de arena prope Pilcz. Petrus Mittag fatetur, sibi tantum esse notum, quia audivit, quod pulli antiquitus de Pilcz essent dati ipsis Streyd, novem vel septem, sed iam darentur solum tres. Junkhannus colonus ipsorum Streid, dixit, se audivisse a Lodechte Thomis, qui sic dixit: Si auderem dicere, ipsis Streyd est abstractum de agro, super quo seminare possent maldratas siliginis. Super quibus omnibus et singulis premissis memoratus dominus abbas Johannes de Camencz a me notario publico subscripto sibi presens publicum fieri petiit instrumentum. Acta sunt hec anno, indictione, die, mense, hora, pontificatu et loco, quibus supra; presentibus famosis viris: Johanne de Petirswald de Bresnicz, Jereslao Swenkenfelt de Quitchendorff et iuveni Benuschio Seckil, herede in Tarnaw, armigeris districtus Frankensteinensis testibus ad premissa vocatis specialiter et rogatis.
Signum notarii.
Et ego Heynricus quondam Petri Dornheym de Caldenborn, clericus Wratislaviensis diocesis, publicus imperiali auctoritate notarius predictorum laicorum recognitioni, examinationi, veritatis fassioni aliisque omnibus et singulis premissis, dum sic, ut premittitur, agerentur et fierent unacum prenominatis testibus presens interfui, eaque omnia et singula sic fieri vidi et audivi et in hanc formam publicam redegi, signoque et nomine meis solitis et consuetis consignavi in fidem et testimonium omnium et singulorum premissorum requisitus.

Or. Perg.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.